A decisión dunha humilde familia campesiña de dar unha filla en adopción a un matrimonio adiñeirado é o fundamento sobre o que Khaled Hosseini
-autor dos inesquecibles Cometas en el cielo e Mil soles espléndidos-
teceu este formidable tapiz no que se entrelazan os destinos de varias
xeracións e se exploran as infinitas formas en que o amor, o valor, a
traizón e o sacrificio desempeñan un papel determinante nas vidas das
persoas.
A historia arranca nunha remota e desolada aldea de Afganistán, onde Sabur e a súa segunda muller se enfrontan en condicións precarias á chegada doutro inverno implacable. Abdulá, o fillo maior, de dez anos, coidou da súa irmá Pari dende que era pequena, e agora ambos os dous escoitan cativados a triste historia que lles relata o seu pai antes de deitalos, a véspera de iniciar unha longa viaxe que os conducirá ata Kabul. Alí, nas buliciosas rúas da capital, dará comezo este fascinante itinerario que guiará o lector dende o outono de 1952 ata o presente, de Kabul a París, dende a illa grega de Tinos ata San Francisco.
Seis anos despois da publicación da súa anterior novela e superados os 38 millóns de exemplares vendidos en todo o mundo, Khaled Hosseini volve demostrar o seu inmenso talento para narrar historias con valor universal e a súa inesgotable capacidade para crear personaxes que nos resultan asombrosamente próximos e auténticos.
Comentarios