Blogue da Biblioteca municipal "Juan Fernández Latorre" de Ortigueira

Esta semana é a quenda dos alumnos de primeiro ciclo. Nesta ocasión lemos a historia de " Titiricircus ". A continuación xogamos a adiviñar diferentes sombras relacionadas co mundo do circo. Para rematar elaboramos un pallaso que podemos colgar na porta dos nosos cuartos cando queiramos que ninguén nos moleste mentres lemos ou estudamos.

Xa comezamos o ciclo de actividades "Pasen e lean". Os primeiros en visitar o noso circo foron os alumnos de infantil para os que levamos a cabo seis sesións, unha por aula. Traballamos coa historia "Tito fai de malabarista". Mónica presentounos un Tito de feltro co que nos contou as súas aventuras. Finalizamos elaborando un monicreque de pau do protagonista.

Novo programa de animación lectora para o alumnado do CEIP "José María Lage". Este ano convertemos a biblioteca nun divertido e colorido circo. Cada aula do CEIP asistirá a dúas sesións nas que traballaremos cun montón de historias cheas de malabaristas, elefantes, pallasos... Esta é a nosa decoración: E este é o noso Photocall:  

A páxina boe.es incorpora un novo servizo, a nova colección de Códigos Electrónicos en PDF e ePUB, que poderemos descargar no noso ordenador, tableta ou teléfono móbil. Estes códigos, permanentemente actualizados, recompilan a lexislación vixente dos distintos ámbitos do dereito español: constitucional, civil, administrativo, penal, procesual, mercantil, social, tributario e financeiro. Os títulos dispoñibles iranse ampliando progresivamente ata abranguer todos os sectores do ordenamento. Permite ademais, crear unha sinxela alerta no correo electrónico, para que nos comuniquen calquera cambio e poidamos descargar a nova versión.